搞 笑 又 傳 神

從網上睇到一篇對某餐廳的評價，真係搞笑又傳神：～ 「唔識欣賞呢間台式麻辣火鍋。食得麻辣火鍋就係想又麻又辣，你唔麻又唔辣想點呢？湯係香嘅，亦飲得出落左重料藥材，亦冇四川重慶啲咁油，咁又點？我唔係嚟食藥材火鍋㗎大佬。

好嘞，你收得咁嘅價錢，緊係對你啲食物質數同服務有要求。先講服務，你哋睇唔到我哋冇口水掮㗎咩？睇漏眼？枱枱客都有我哋冇你哋冇人發覺？好嘞，嚟咗食物就淥啦，淥完先發覺冇醬汁，要我開口問先識得俾我。啲waiter唔理我仲淥緊嘢就話幫我添湯，一嘢就倒啲唔熱嘅湯落去，成煲凍哂。你唔俾我淥埋先都等我縮手先吖。咩服務呀？街邊舖仔我就唔介意。個經理仲搞笑，食到尾先埋嚟同我哋較細個火，話太猛火個湯會苦喎，你唔好埋單先講？

食物質數亦唔見好突出。八點倒得一半客，經已話賣哂手切本地牛，算，食返美國牛。但成四百蚊碟牛肉，第二度一樣有靚裝修，服務好過你嘅二百幾蚊都食到。又成四百蚊嘅海鮮拼盤，蝦，蟶子，大蚌各兩件，蜆四粒，魚四件，係咁多。寫就寫活魚，你俾四件細細嘅魚頭魚校我？仲要係細魚完全冇嘢可食。魚肉呢？你寫活魚都好誤導啫下話。」 「你唔好埋單先講？」真搞笑！