你最兇殘無人性嘅，就係臨上車之前，嗱嗱臨吸多啖。一上車，頂住你個肺嗰啖煙，你好大力咁噴出嚟。架車關晒窗，咁你擺明製造 Gas Chamber，焗我吸毒氣，仲搞到我嘅頭髮、毛孔、皮膚全部黐滿煙味。你一見到反白眼，佢就話：「去 BBQ，去食韓國烤肉夠係成身煙味啦。」喂，點同呀？一，食韓國烤肉係我食，食煙係你食，你享我要受，我會高興咩？二，焦油點同豬油呀？焦油殺傷力勁過豬油喎。三，我一向嫌棄煙三文魚、煙鴨胸、煙火腿，煙民。上咗你架車，我被煙熏，變成煙人，好似俾喪屍咬完都變成喪屍咁，我點面對自己呀？
最恐怖係你噴完煙，放完毒，竟然覺得應該食番粒香口珠清下啲口氣。你打開個盒，倒咗幾粒，然後用你兩雙黐滿焦油嘅手指，攞咗兩粒俾我。你遞過嚟嗰陣，手指嗰陣煙味，難聞到我係咁咳，你竟然問我係咪頂唔順香口珠啲薄荷味。我以為焦油淨係黐住你個肺，乜原來仲塞埋你個鼻同你個腦呀？嗰粒係薄荷味香口珠咩？根本就係焦糖香口珠個親戚焦油香口珠啦。
食煙係應該將自私進行到底，政府亦應該大力支持配合，擺多啲流動廁所咁嘅煙房，俾人喺間房食完煙，再吸返，唔好嘥，橫掂一包煙咁貴。一於自吸自足，唔好益人。
陳 嫣
沒有留言:
張貼留言