巴 士 內 功 心 法

        近排港鐵受到破壞，好多站被逼關閉，好多朋友每早返工都要計劃交通安排，好在有網民發揮守望相助嘅精神，創作咗「巴士內功心法」，披露好多巴士嘅冷知識，教授大家更容易選乘不同路線嘅巴士，相信學懂之後，準時返工返學就無乜難度！
       由網民創出嘅「巴士內功心法」，教大家首先了解自己屋企樓下同公司樓下所有巴士路線，通常有一至二十條不等。之後要知道樓下路線去邊，經邊條主幹道，通常主幹道同大站都有大量巴士線途徑，咁就可以轉車，將一條線化成無限可能。
　　最重要嘅一環，係學習巴士路線號碼嘅邏輯，幾乎每個數字同英文字母都有特殊意義。以九龍新界為例，259D 嘅 2 代表九龍區，5 係屯門區，9 係屯門碼頭區，而 D 係屯門區往觀塘區。只要知道每條巴士路線車牌嘅密碼，一睇到就知會去邊，方便安排接駁或轉車啦。
　　最後，要以無法為有法。一個好嘅乘客，要坐出自己節奏，更唔可以比路線牽住你走，要能夠靠不斷轉車將巴士變成的士嘅走線，忘記路線，坐出多變組合。原來有咁多巴士冷知識，令我大開眼界。