私 己 錢

　　大雄自從同小瑛結婚之後，每月人工都要上繳，連出去食多餐飯都唔得，非常可憐。
　　有一日，佢決定收埋少少私己錢，唔話畀老婆知。
　　正當佢喺間房搵緊合適嘅隱蔽位時，突然喺衣櫃頂上搵到一個封咗口嘅文件袋，上面更寫住「前男友」。
　　大雄一見到就好嬲，心諗：「老婆居然仲收埋前男友嘅嘢喺自己屋企，實在太過份喇！」
　　於是決定撕開張密封條，睇清楚入面裝住啲咩。
　　一打開，就發現入面得一張字條，上面寫住：「想收埋私己錢？無咁易！老公，封條已撕開，同我自動放二千蚊入去，充公！」