璇 宮 皇 都 ( Harry Odell )

       生於開羅，畢業於上海聖芳濟書院，帶住一個向古典音樂許下嘅期盼熱忱，成就香港一個鮮為人知嘅古典藝術舞台。呢個人，名叫 Harry Odell，俄裔猶太商人歐德禮。

皇都戲院天台的圓拱橋樑式屋頂是為亞洲獨有。

       傳奇嘅歐德禮 ( 1896-1975 ) 原名 Harry Obadofsky，打過兩次世界大戰，包括香港保衛戰，曾為日軍戰俘，踢躂舞、電影發行都係佢嘅職業。25 歲由美國來港，並於戰後在證券界發跡嘅歐德禮，藉自己成立的公司「萬國影業」( International Films Ltd. )喺有「小上海」之稱嘅北角興建璇宮戲院 ( Empire Theatre )。1952 年 12 月璇宮開幕，戲院採用現代主義結構美學，飛拱 ( flying buttress ) 屋頂混凝土骨架 ( Barrel Vault ) 連接前後兩幅外牆，建成招牌嘅無柱天花；而迎向英皇道的弧面外牆，則築上一幅出自雕塑家梅雨天嘅「蟬迷董卓」浮雕。加上扶手電梯、地下停車場，使戲院成為當年湛新舞台設計典範。

       由建築師劉新科及 1950 年嘅香港測量師學會主席 George.W. Grey 所設計嘅璇宮，可以容納逾千觀眾，成為來自世界各地古典音樂名家雲集在這東方之珠嘅表演殿堂。不久電影業發展迅速，1957 年璇宮易手兩年後改建為皇都戲院 ( State Theatre ) 放映電影，甚至連紐約華埠唐人街，也有一間外牆附有壁畫嘅璇宮戲院。

       無奈及後皇都光輝不再，1997 年戲院結業，改為桌球會及商場，再後來商場更追不上時代更替需要，只淪為位處繁華商住區中平價物品服務少數基層生活。相對街外繁燈閃爍途人匆匆，商場內運作商店卻寥寥可數，有如時間進入膠著狀態，卻非跟時代息息相關。偶爾見到劇院遺痕，但大部分曾經觀眾絡繹不絕嘅通道，此時此刻幽暗寂寞。老人垂垂欲睡，點點蛛絲馬跡難以想像昔日輝煌。

華燈初上，站在皇都對街遙望一切欲語還休，一代璇宮代表一個精緻古典音樂標誌，讓港人可以近距離見識和享受全世界最好音樂。在面對地產霸權現實下，釘子戶被收購大厦業權，叫整體建築可謂岌岌可危。其實皇都理應可得到更好回報，慶幸仍有許多港人關注保育，免輝煌建築淪於堆填區中廢土。
       歷史見證世代更替，有幸今天皇都戲院嘅傳奇建築，六十幾年後 2017 年幾經波折之下，才被古物諮詢委員會最終確立評為一級歴史建築。相信曾經迴旋在璇宮嘅天籟之音，有如歌劇《歌聲魅影》( The Phantom of the Opera ) 嘅故事，於黑暗隱藏在巴黎歌劇院下水道嘅 Phantom 呼喚女主角 Christine，那繞樑歌聲將會喚起那如火燄熾愛，希望有一日，甦醒嘅劇院幽靈，能夠再燃燒起歐德禮及香港古典音樂之夢！