未 來 社 會 棟 樑

  「夕陽無限好」下一句係咩？相信好多人都知係「只是近黃昏」。但有學生畀出創意答案，佢喺 facebook 專頁「名校 Secrets」發帖話中文老師畀一份功課佢哋，要求續寫句子，樓主開頭以為係小學生功課，但望落唔似要寫對聯，上網又搵唔到標準答案，而老師又冇話唔可以自己創作，於是答咗創意答案，相當搞笑。
　　「頭可斷、血可流」下面樓主續寫「靚女不可不追求」；「相嗌唔好口」下答「夠薑就隻揪」；「天地有正氣」配「無錢無天理」；而「夕陽無限好」下句樓主就答「瞓覺就趁早」。
　　網民紛紛表示好搞笑，仲話「想睇老師點評你」，又有人認為樓主文采好「文學獎仲唔係你」、「未來社會棟樑」。