有 船、有 海、有 魚 生

  在灣仔碼頭開設「築地」魚市場食府，真係好橋，又有創意，有船、有海、有魚生，不禁令人食指大動。
　　灣仔碼頭，係交通轉運站，過海搭船必經之地，但係位置算係「隔涉」，上了岸，有排行入市中心。況且，香港人分秒必爭，搭船已經不是有效率的生活節奏，我二十年來數埋手指，都無過十次海。
　　所以，係灣仔碼頭搞乜都死。酒樓食肆、書局零售，邊有人有閒心去幫襯。但是，為了去築地，我真係由尖沙咀搭船過去，一嚐日式魚市場風味。
　　門口的日式木建築，滿眼日本風情，澄黃燈光，刺激人的食慾。場內面積大，非常寬廣，兩邊有日式清酒，定食外賣，裏面多間不同舖面，隨意立食，豐儉由人，魚生最重要係新鮮多款，我問過老闆，他們取名築地，真正授權，是與日本山貴水產合作，每日得築地真正魚獲海產運來香港。
　　日本有得食的，香港都有入口，保證新鮮。未吃魚生，先來品酒，一式五杯的梅酒套飲，擺出一個梅花陣，由淡至濃，拾級而飲。日本梅酒味偏甜，老闆話他們的梅酒都是自家釀，酒濃，不太甜，重果味。未吃魚生，試過海鮮龍蝦包，幾得意，蝦肉夾甜，混鮮沙律，美味小食，之後大啖魚生。
　　築地魚市場勝在魚生優先，價錢不貴，一邊立食，一邊飽覽維多利亞夜景，海風宜人，燈飾耀目如此五星級的香港，很久沒有這個機會慢慢品嚐。

         林 超 榮